يعتقد بعض من يكتبون الشعر ان اللغة العاميه سهله ولا تحتاج سوى رص اى كلام واليوم احاول ولاول مره اكتب باللغة العاميه لكن باسلوب اشرف محمود
بترول وغاز وقنال
____________
العالم العربى فين
يمكن يكون أطلال
حتى الاطلال اختفت
ولا لاقى ولا بقال
وكان فيه هنا مطعم
لعم عاشور الفوال
ومصمط يبيع كرشه
وكوارع بقر وجمال
وقهوه بلدى ياما
سمعنا فيها جلال
وام كلثوم ونجاة
كنا بجد رجال
اليوم ياعبنى عليها
يتمطعوا حمير وبغال
وهات يازعيق وخناق
ولا بينهم حبل وصال
كل واحد له عيد
وكل واحد عنده هلال
وتلاقيهم مشهورين عنا
ماهو لكل واحد جورنال
يمجده ويسيده ويصور
البغل كانه غزال
وكل حمار فى موكبه
يعمل للمرور زلزال
فى السبعين وشعره اسود
ماتقولش شعر عيال
وفى بنوك سويسرا
اسمه كما الطبال
ورصيده من كل لون
الف شكل من الاشكال
وكل شكل يادوب مليار
ماهو بترول وغاز وقنال
والنمل سارح فى شارعنا
يغنى فى كل بيت موال
اذا كنت انا الشاعر
مش لاقى كلام يتقال
ياعينى على الفلاح
وياقلبى على العمال
ليست هناك تعليقات:
إرسال تعليق